काठमाडौं। रूपन्देहीको क्रिमसन अस्पतालमा उपचाररत गुल्मीका कोरोना संक्रमित बिरामीको मृत्यु भएको छ। अस्पतालको भेन्टिलेटरमा राखेर उपचाररत बिरामी गुल्मीको मदाने गाउँपालिका-६ का ४१ वर्षका पुरुषको आज बिहान मृत्यु भएको प्रदेश ५ सरकारले पुष्टि गरेको छ ।
रुपन्देहीको तिलोत्तमा नगरपालिका–५ स्थित क्रिमसन अस्पतालमा उनको उपचार भइरहेको थियो । अस्पतालको भेन्टिलेटरमा उपचार गराइरहेका उनको बुधबारदेखि स्वास्थ्य अवस्था गम्भीर थियो । प्रदेश ५ का सामाजिक विकास मन्त्री सुदरर्शन बरालले बिहिबार (आज) एक विज्ञप्ति जारी गरी उनको मृत्यु भएकोमा दुःख व्यक्त गरेका छन् ।
‘क्रिमसन अस्पतालमा उपचाररत शिक्षकको बिहीबार बिहान दुखद् निधन भएको छ । उहाँलाई बचाउन अनेकौं प्रयास गर्दा पनि बचाउन नसकेकोमा निकै दुःखी छौं,’ मन्त्री बरालको विज्ञप्तिमा भनिएको छ । मृतक कङ्गे देउराली आधारभूत विद्यालयका प्रधानाध्यापक समेत रहेको उल्लेख गर्दै विज्ञप्तिमा उनको निधनले शिक्षा क्षेत्रमा अपूरणीय क्षति भएको बताइएको छ ।
उनको मृत्यु सँगै नेपालमा कोरोना संक्रमित भएर मृत्यु हुनेको संख्या ३ पुगेको छ। यसअघि सिन्धुपाल्चोककी २९ वर्षीया महिला र बाँकेको नरैनापुर ५ का २५ वर्षीय युवकको कोरोना संक्रमणका कारणले मृत्यु भएको छ।
