लगातार बढीरहेकाे काेराेना भाइरसकाे प्रकाेप कम गर्नका लागि टाेकियाेमा आगामी २५ अप्रिल देखी ६ मई सम्म ‘स्टे हाेम वीक’ लागु गरिने भएकाे छ ।
काेराेना भाइरस संक्रमणलाइ नियन्त्रण गर्न जापान सरकारले देश भरी संकटकाल घाेषणा गरेपनि जापानका शहरी क्षेत्रमा भिडभाड कम भएकाे छैन । बाक्लाे जनसंख्या तथा ब्यस्त टाेकियाेका दैनिक १ सय जना भन्दा बढी संक्रमित देखिएकाले यसलाइ कम गर्नकालागि आगामी २५ अप्रिल तारीक देखी ६ मई सम्मका १२ दिन ‘स्टे हाेम वीक’ अर्थात ’जीवन रक्षाका लागि घरबाट बाहिर न निस्काैं’ भन्ने दाेश्राे चरणकाे कार्यक्रम रहेकाे आज (बिहिवार) पत्रकार सम्मेलनगरी टाेकियाेकी गभर्रनर युरिको कोइकेले बताएकी छन् । उनले गोल्डेन विकको बिदामा सबैलाई घर भित्रै बस्न र अन्य प्रिफेक्चरहरुमा नजानका लागि समेत अनुरोध गरेकी छन् ।
जापानमा संकटकाल घोषणा गरेपछि जापानका शहरी क्षेत्रहरूमा मानिसहरुको भिडभाड घटे पनि सुपरमार्केट तथा शपिङ्ग सेन्टरहरुमा भने भिडभाड झन बढेको पाइएको छ । बिहिवार आयोजित पत्रकार सम्मेलनमा गभर्रनर कोइकेले कोरोना भाइरस संक्रमणलाई नियन्त्रण गर्न र सुपमार्केटहरुमा देखिएको भिडभाड घटाउन जरूरी रहेकाे बताउँदै टोकियोबासीहरुलाई तीन दिनमा एक दिन मात्र किनमेलका लागि बाहिर निस्कन अनुरोध गरेकी छन् । उनले भनिन् “अर्को दुई हप्ता टोकियो र जापानका लागि महत्वपूर्ण समय हुनेछ। घरमै बस्नुहोस्, म दृढतापूर्वक नागरिकहरूलाई अपील गर्न चाहन्छु।”
टोकियोमा बिहिवार १ सय ३४ जना कोरोना भाइरसको संक्रमित थपिएका छन । योसंगै टोकियोभित्र संक्रमित हुनेहरुको संख्या ३ हजार ५ सय ७३ जना पुगेको छ भने ५९ जना संक्रमित निको भएका छन् ।