काठमाडौँ । एकाविहानै सामाजिक सञ्जालमापर्ःत अन्तराष्ट्रिय क्रिकेटबाट पारश खड्काले सन्यास लिएको घोषणा गरेसँगै नेपाली क्रिकेट क्षेत्र तातिएको छ ।
दुई बर्ष अघि क्रिकेट टिमको कप्तान पदबाट बाहिरिएको घोषणा गर्दा पनि मानिसहरु आश्चर्यचकित परेका थिए । यसपटक पनि खड्काको उक्त कदमले क्रिकेट संघ आश्चर्यमा परेको छ ।
खड्काले सन्यास लिँदा क्रिकेट संघलाई जानकारी नगराएको पाइएको छ ।
आईसीसी विश्व क्रिकेट लिग टूका लागि नेपाली राष्ट्रिय टोलीको मंगलबार बन्द प्रशिक्षण सुरु गर्ने तयारी थियो, तर पारसले अन्तर्राष्ट्रिय क्रिकेटबाट सन्यासको घोषणा गरेका छन् । अध्यक्ष चतुरबहादुर चन्दका अनुसार मंगलबार विहान करिव साढे ७ बजेतिर पारसले इमेल गरेर सन्यास लिन लागेको जानकारी गराएका थिए ।
पारसको सन्यासबारे चन्द भन्छन्, ‘कप्तानबाट राजीनामा दिए जस्तै अप्रत्यासित भयो ।’ यसबारे क्रिकेट संघको औपचारिक धारणा आउने समेत उनले बताएका छन् ।
यसअघि पनि खड्काले आफूले कुनै काम गर्दा क्रिकेट संघलाई जानकारी नगराउने गरेको भन्दै पदाधिकारीहरु रुष्ट हुने गरेका छन् ।